هو لو فى إله أكيد هيكون خلق الكون ده كله، الكون ده كبير أوي بجد يعني أنا بالنسبة للكون ده ذرة أو أقل
هل الإله اللى خلق الكون ده كله هيفرق معاه إذا كنت محجبة ولا لأ؟ ولا أربي كلب ولا لأ؟ او أسمع ميوزيك ولا لأ؟ أنا عندي ١٦ سنة بس متلخبطة أوي بجد عقلي مش راضي يقتنع بأي حاجة في الإسلام .
الكون كبير جدا جدا فعلا .. لدرجة إن الأرض نفسها بالنسبة له ذرة!
والأرض دي نفسها فيها أحياء كثيرة جدا جدا لدرجة إن الإنسان بالنسبة لعددها ذرة!
رغم كده .. مفيش في الكون ده كله مكان مؤهل لمعيشة الأحياء غير الأرض، ومفيش كائن مؤهل لاستكشاف الكون ومعرفة عظمته وحجمه غير الإنسان!!
يعني مش معنى إن الكون كبير جدا جدا إن الإنسان تافه ولا قيمة له، بالعكس..
الكون الكبير جدا جدا ده مفيش فيه غير مكان واحد بس مؤهل لمعيشة الأحياء ومفيش في الأحياء غير كائن واحد بس هو القادر على فهم الكون واستكشافه!
يعني دي رسالة إن الإنسان له شأن عند من خلق الكون الكبير جدا ده!
غير كده .. من خلق كون كبير جدا جدا هل المتوقع إنه يكون قادر حكيم سميع عليم بصير ولا لا!؟ يعني موضوع علمه بما تفعلينه مش أمر صعب وعسير ولا حاجة! يبقى إيه وجه الاستغراب!!؟
الموضوع عادي خالص على فكرة!
أقول لك أنا إيه وجه الاستغراب، الموضوع نفسي بحت، زي واحدة بتقول لسيدة متزوجة "زوجك بيخرج كتير جدا"!! هل دي معلومة جديدة عليها؟ لا طبعا، ما هي عارفة إنه بيخرج كتير! لكن لما تيجي من واحدة ست علاطول نفسيا بتفهم إن فيه مشكلة!
رغم إن المعلومة عادية وهي عارفاها من زمان ومش لازم يكون معناها إن زوجها متزوج من اثنين مثلا!
نفس الكلام إنتي طول عمرك عارفة إن الكون كبير جدا وإنك صغيرة قوى فيه، بس فجأة قريتي لواحد ملحد أو لاديني إن "الكون كبير جدا وإننا صغيرين قوي فيه"، علاطول دا نفسيا قلب عندك إن فيه مشكلة وشبهة والموضوع كبير وإنك مش عارفة تقتنعي ...
هتقابلي من دا كتير وهتتعبي كتير لو فضلتي تقري في الكلام دا وللناس دي!
طيب الحل إيه؟ مش جايز يكون كلامهم صح!
الحل إنك تصبري على نفسك وتقرئي في دينك من مصادر تقنعك وتفهمك وبعدين هتلاقي نفسك عندك ثبات انفعالي واتزان ونضج ومش كل واحد يقول لك كلمة ملهاش أي معنى يهزك ويلخبطك بها!
خدي الأمور واحدة واحدة ومتستعجليش ومحدش بيتعلم في يوم وليلة، وكل اللي أنتي بتقريه الوقتي وبيلخبطك دا مع الوقت هتستغربي هو كان بيهزك إزاي؟!
